Isa ang patay habang isa pa ang nasa kritikal na kondisyon matapos magbanggaan ang isang minibus at isang trak sa isang highway sa Bataan nitong Biyernes ng umaga.
Nasawi ang isang pasahero ng minbus dahil sa aksidente. Nadala pa umano ito sa Bataan General Hospital, ngunit idineklarang dead on arrival dahil sa mga natamong sugat, ayon kay PO3 Charleston Valenzuela ng Mariveles Municipal Police Station.
Kritikal naman ang driver ng trak. Nananatili ito sa Bataan General Hospital.
Dinala rin sa naturang pagamutan ang ilang mga nasaktan sa insidente. Ani Valenzuela, pauuwiin na ang ilan sa mga ito, ngunit aanyayahan silang pumunta muna sa municipal police station upang mahingan ng detalye tungkol sa aksidente.
Ayon kay Valenzuela, galing sa Balanga City ang minibus at papuntang Mariveles, habang ang trak naman ay tumawid para pumarada sa kabila ng highway.
Source : http://news.abs-cbn.com/news/03/17/17/minibus-at-trak-nagbanggaan-sa-bataan-1-patay-1-kritikal